Þann 1. apríl í þjónustusvæði Eirar að Hlaðhömrum 2, Mosfellsbæ voru undirritaðir samningar um tilraunaverkefni milli Eirar hjúkrunarheimilis, heilbrigðisráðuneytisins, félags – og húsnæðismálaráðuneytisins, Mosfellsbæjar, Heilsugæslu höfuðborgarsvæðisins og Sjúkratrygginga Íslands, í tengslum við aðgerðaráætlunina Gott að eldast.
Með umræddum samningum verður Eir hjúkrunarheimili falið að sinna samþættri heimaþjónustu fyrir Mosfellsbæ og heimahjúkrun fyrir Heilsugæslu höfuðborgarsvæðisins til íbúa Mosfellbæjar og Kjósarhrepps. Þá verður komið á fót Heima – endurhæfingarteymi en Eir hefur um árabil rekið eina stærstu öldrunarendurhæfingu sem boðið er upp á utan Landspítala. Samhliða samþættingunni verður dagþjálfunarrýmum sem Eir rekur að Eirhömrum í Mosfellsbæ fjölgað og bætt við dagþjálfunarrýmum fyrir aldraða einstaklinga með heilabilun.
Markmið verkefnisins er að tryggja íbúum Mosfellsbæjar og Kjósarhrepps örugga og góða félags – og heilbrigðisþjónustu með einföldum boðleiðum og samfellu í þjónustu. Lögð verður áhersla á að þjónusta og umönnun sé í einu flæði, mannauður og sérþekking verði samnýtt í gegnum teymisvinnu og einstaklingum verði betur mætt á sínum forsendum með auknum sveigjanleika í þjónustunni og fjölgun þjónustuúrræða. Þá verður lögð aukin áhersla á að efla íbúa til sjálfshjálpar og virkni með tilkomu endurhæfingar í stuðningsþjónustunni.
Stofnun þessara úrræða er liður í aðgerðaráætluninni Gott að eldast en um er að ræða sameiginlegt tilraunaverkefni á vegum heilbrigðisráðuneytisins og félags – og húsnæðismálaráðuneytisins sem ætlunin er að standi yfir til loka árs 2027.
Ljósmyndir eftir Christine Quirona
Myndband neðst í frétt eftir Christine Quirona
